‘U Salvaturi


– Ma chi mi staj dicennu, tu, pasturi,
ca chistu ammenzu ‘a pagghia jé ‘u Salvatori,
figghiu divinu ca non mori maj?
Ma statti mutu, và, ch’è megghiu assaj.

Jù viru sulu cca ‘stu bammineddu
mortu di friddu, veru puvureddu,
e ‘u patri so ca fa lu fallignami:
propriu lu re de’ re, ca mori j fami! –

– Amicu, mancu jù crideva nenti
a chiddu ca cuntavanu li genti.
Chistu, vinùtu ‘nterra pi ll’Amuri,
jè Diu ca salva ‘u munnu piccaturi,

mannàtu pi llu Verbu e ‘nsignamentu
pi divintari Santu Sacramentu,
ca supra mali o oddiu jè lu cchiù forti
e ‘a Vita ca ni duna vinci ‘a morti.

Assaj curiusu, mi c’avvicinaj
e ‘ntrignu ‘ntrignu all’occhi ‘u taliaj:
cridimi, amicu, ammenzu a tanta luci
visti, ca allatu, cumparìu ‘na Cruci. –

Alfia Contino
Mascalucia (CT)

Annunci
%d blogger hanno fatto clic su Mi Piace per questo: