U Prisepiu


Trasi, amicu,
trasìti, gghiènti, ca passati rê strati:
Bbiriricìti a ma casa,
a porta è aperta,
u scaluni bb’arrìri
i segghi ppi ttutti
e cc’è a conca ccô luci,
a bbuffetta, u pani e cc’è u vinu
i luppini e i favi caliati.
Manciati e bbiviti e ttaliati!
ccô tascu ntê manu, taliati,
ca c’eni ntâ gniùni, cunzatu u Prisèpiu.
Stisa a ciàna ri lippu
i munti r’tattuòrnu e u pajsi
e a ccentru nnicuzza -bbella!- na rutta
linzudha ri lignu, mura ‘i cartuni
u ponti ri scroppa,
u sciùmi e a nivi ‘i cuttuni,
i picuredhi pasciènnu, u cani e u pasturi
e i rrè maggi a ccavadhu ca pòrtunu i rriàla.
E cc’èni a stidha cumeta
pannedha r’argentu
c’anzinga ccâ cura
ntâ nacuzza ri pàgghia u Bbammìnu
e Gghiuseppi e ô cantu Maria
e u vol vlemu cô sciàta
e u sciccarièdhu pïulùsu talia.
Sunu pitrudhi
pupidhi ri crita
cusuzzi ri nenti
ma finciunu tanta santa prisenza
simenza r’amuri e ri spranza
bbramu ntô cori r’atèrnu
e ntâ-ll’armu.
Trasìti, amici,
gghiènti, rê strati rô munnu,
vicinu e lluntanu
ràmini a manu
ntâ stu juòrnu spiciali
ca èni u juòrnu ‘i Natali.

Salvatore Vicari
Ragusa

Annunci
%d blogger hanno fatto clic su Mi Piace per questo: