Quanti stiddi…stasira


Quantu stiddi stasera, nta l’ariu

nettu ca non paventa trona …

E’ la notti ca nasciu lu Bamminedu!

Ci penzi, Ninu, quann’erumu carusi?

Pi novi seri cu ddi naschi all’aria,

mmenzu ‘n “turri turri” di prijeri,

spittaumu la Stidda ca calava

supra na ‘rutta cognita e friddusa …

C’era ‘n-ciaramiddaru arriciatatu

ca scudduriava ghiommira di sonu,

na cona apparricchiata nta na gnuni

– autuna ppi nuautri picciriddi –

e c’era, sutta ‘n-celu di spinapulici,

‘n-capizzali sgangatu ca matri ‘i Ddiu

‘n-angilu di cartuni appisu a ‘n-filu

e, supra lu lippu friscu, quattro pasturi

di crita a mmenza facci, tri picureddi

e … p’urnamentu aranci e mandarini.

C’era la bona palora a coffi chini

e si manciava pani e … cuntintizza …

Nta l’ariu nettu riuturi lontani

d’apparecchi ‘ngrisi e miricani!

Ma chi lustru nta sti strati novi, Ninu!

Non nasciu ‘nta la pagghia lu Bamminu?

Forsi dda stidda stralucenti d’Amuri

ristai ‘nte razza di na manciatura?

O non la videmu, allucinati comu semu

di l’oru fausu ca nni jinchi li manu

e nni svacanta lu cori, manu d’omu

ca mastriunu cruci e munciunu vilenu

pi tanti “bammineddi” di sta terra,

pi tutti li “cristi” c’appillamu “frati” …

Ma quantu stiddi, stasera, Ninu,

ca trapunciunu stu celu ‘nzalanutu!

Carmela Tuccari

Aci S. Antonio

Annunci
%d blogger hanno fatto clic su Mi Piace per questo: