Prisepiu di Natali

PRISEPIU DI NATALI

Na grutta na stadda e ncelu na stidda.

Dintra na manciatura, nta la pagghia,

senza fascianni, senza annacalora,

nasciu nudu e crudu lu Bamminu.

Era scrittu nta la menti di Diu

l’annunziu di Michea ed Isaia

e papali papali s’avvirau.

Cu na grutta, na stadia e na cometa,

cu cartunazzu e pasturi di crita,

mi fici lu prisepiu di Natali.

Ci misi lu scantatu di la stidda,

ca guarda l’astru cu l’occhi spirati.

Ma puru nui, senza guardari stiddi,

semu chiù d’iddu pigghiati di scantu.

Lu munnu addivintò na Palistina

Cu Erodi ca fa straggi d’innuccenti.

Unn’era anticamenti la Giudea ,

Terra Santa pi tri Cunfissioni,

c’è cu preja a lu Muru di lu Chianti,

cu chianci a chiddu di lu spartimentu,

cu a nomu di giustizia e fratillanza

predica paci a li seggi vacanti.

Unn’era Galilea e Samaria

non si simina chiù frummentuamuri,

culatri cu braccianti e metituri

schiantanu alivi pi chiantari cruci.

Amaru nui ca, pi tintazzioni,

desimu aricchi a scribi e farisei

e ni scurdammu li Prufeti Santi.

Quannu lu Spiritu Santu ncarnò

annintra di lu ventri di Maria,

lu Patri non ni dissi ca sò Figghiu

ha fari pacchiana e scinni di la cruci,

chiddu chi dissi lu dissi a Musè

quannu ci detti li Cumannamenti.

Ncostu a la grutta misi li Re Maggi;

tri quantu su li razzi di lu munnu,

ca portanu pi strinna a lu Bamminu

li chiù megghiu ricchizzi ca ci sù:

la Carità , la Fidi e la Spiranza.

Carmelo Furnari

Catania

Annunci
%d blogger hanno fatto clic su Mi Piace per questo: