Prijera a Cristu omu


A Cristu omu,
ca pò tuccari lu civu di lu suli,
addumannu na vampa nica nica
pi la cìcara ca n-manu strinciu
comu calaciu di consacrazioni.
A Cristu omu,
ca pò cogghiri ciuffi di nuvuli,
addumannu un biccheri d’acqua.
A Cristu omu,
ca pò scinniri n-funnu a lu munnu,
addumannu un cuppinu di terra.
E doppu vurrissi
na lacrima nica nica di duluri
ca di la cruci scinniu
p’addrizzari na varca
ca jva e va a lu scarrozzu.
E poi quattru muddichi di l’amuri
ca brucia sempri
nni lu pettu di la Matri Celesti.
E chistu ju addumannu
p’arriminari tuttu cu la fantasia
pi fari na mpastata speciali
e cu sta mpastata un munnu nicu
ca nun gira chiù comu strummula.
Chistu ju addumannu
pi vidiri picciriddi strinciri
un piattu di risu, un pezzu di pani,
na pira, na banana.
Vogghiu caminari nto n-chianu virdi
pi scorgiri l’omini chiantari
puru simenza di ciuri d’amuri.
Sulu accussì pozzu fari a feddi
tu munnu di sonnu
p’appizzallu a un ramu d’alivu
unni cu carma si ponnu annacari
palummi bianchi ca portanu paci.
E siddu lu Bamminu di lu presepiu
mi scaccia l’occhiu e mi ridi
è signu ch’è d’accordu cu mia.

Stefano Puglisi
Palermo

Annunci
%d blogger hanno fatto clic su Mi Piace per questo: