Natali

NATALI

Se strata faciennu
muligni sienti e cianciani sunari
ri picurèddi pasciennu ntà ciusa,
aruci
èni
r’agniddùzzu ca ciama
se ‘a sienti
‘a so vuci.
E se ‘na ‘mmòta ‘i campana
sienti ca sona ra chiesa,
e ti ciama,
aruci
èni
se o cantu r’artàru,
cco sciàuru ‘i ‘nciènzu,
sienti
ca pourti ciù lègghia
‘a to cruci.
E sta matina
se ‘u scrusciu nto tettu ti sbigghia ro vientu,
e ti ciama
aruci
èni
se ‘u cori ti rapi no piettu
o missagghiu r’amuri e ri spranza
e sienti
ca l’àrma
cco sciùsciu r’atèrnu
t’annunci.
E nto cursu ‘a jurnata ‘n caminu,
ra gghènti ca ‘ncuontri a migghiara,
aruci
èni
se unu ti ciama,
e sienti,
nta stu juornu spiciali,
ca strinciènniti ‘a manu,
ti rici: “Amicu, bon-Natali!”

Salvatore Vicari
Ragusa

Annunci
%d blogger hanno fatto clic su Mi Piace per questo: