Natali a lu spiziu di li vecchi


Chi sènziu ponnu aviri
tutti li festi ‘i l’annu
ppi sti vecchi piddiati e sularini,
straniati di lu munnu, senza casa,
senza figghi e parenti?
Eppuru …

Eppuru, si v’ammatti quarchi vota,
di trasiri nno spiziu
la notti di Natali,
taliatili nna l’occhi
e ci truvati un preju di carusi
e tanti, tanti, stiddi spirlucenti
quanti non n’avi ‘n-celu.
Ddà è lu veru prisebbiu
e l’arvulu paratu, ddà l’artàru
ccu li lampi addumati,
ddà lu sonu di tutti li campani.

Taliatili nna l’occhi, e ci truvati
l’ali d’oru di l’ancili,
tutta la maravigghia di pastura
quannu, la notti santa,
s’atttruvaru davanti a lu Bamminu,
e la nnucenza di nuveni antichi
e la chiarìa di l’acqua di la fidi.

Taliatili nna l’occhi
unni scurrunu nuvoli di ncenzu
di luntani riòrdi
e ùmmiri di cruci
e palori spirduti.
Non ci truvati cinniri e carvuni
supra a ‘n-visòlu friddu di silenziu,
ma la paci di l’acqua di lu tempu
ca scurri sutta a ‘n-muru
unni l’anni si posanu aggiuccati
comu palummi janchi,
una vicinu a l’autra.
Pirchì chistu è Natali:
un ghiòmmiru d’amuri ca mpidugghia
vicchiània e carusanza,
na ciàccula di suli,
ccu li capiddi scioti nna lu ventu,
puru avanti ò canceddu di la morti.

Si putissi arricogghiri
dintra a na spera limpia di cristallu
lu spicchiuliu di luci
c’arriciala di l’occhi di sti vecchi,
la jisassi nno celu
e ci ciusciassi arreri
ppi fàrila passari supra o munnu
comu nova cumeta
di vita e di spiranza.

Ma sulu la to manu piatusa
pò fari stu ncantisimu, Signori.


Giuseppe Sciarrone
Messina

Annunci
%d blogger hanno fatto clic su Mi Piace per questo: