Mamà chi voli riri ca è Natali?


– Mamà chi voli riri ca è Natali?

– Vo ddhiri ca nascìu u Bamminieddhu:

– E cchi nasci ogni annu? ‘N crisci mai?

– Vo crisciri  e nun po’, figghiuzzu beddhu.

– Nun po’? Pirchì nun po’, cu cciù priubbisci?

– Nun po’ pirchì avi friddhu

E nun lu ‘ntuppa nuddhu.

Avi fami,

e nuddhu ca cci runa ‘n piezzu i pani.

E’ malatu

e nuddhu si  ni cura.

E’ sulu, vinutu ri luntanu

E nun c’è nuddhu  ca cci runa na manu.

Cco cori a piezzi, cianci ’nta na ciazza

E nun c’è nuddhu ca u cunforta e u bbrazza.

– Ma iu, a ‘mienzu e strati nun lu visti!

– Ti passau o cantu e nun lu canuscisti!…

Ignazia Iemmolo Portelli

Annunci
%d blogger hanno fatto clic su Mi Piace per questo: