La tuvagghia di Natali


L’attruvai vurricata
ntra robbi vecchi, dintra a ‘n-cantaranu,
la tuvagghia di linu a ciuri russi
ca me matri stinneva
supra ‘n-tavulu nticu, scunsintutu,
sulamenti la notti di Natali.
L’alliffava na nticchia, pacenziusa,
e, si c’era un piliddu,
ci ciusciava di supra.
“Viniti tutti a tavula – diceva –
Vi voli tutti nsèmula u Bamminu”.
E taliava cuntenta la famigghia.

Ognidunu o so postu,
facennusi la cruci, si mitteva:
me patri, li carusi, li cucini,
lu nannu ccu la nanna, u zu Nicola,
compari Gionni, ditti “u mmiricanu”,
la monica di casa Cannilora.
Me matri s’assittava e si suseva
ppi purtari li piatti,
e la tuvagghia, liscia, allicchittata,
pareva diri a tutti: “Bon Natali!”

La niscii du casciuni e la vardai:
era tutta stinciuta, gialinusa
e pigghiata di càmula;
tanfiava di rosi ammaciunati
e di cosi scurdati unni si posa
la muffa di lu tempu.

“Ammogghiami – mi dissi – donnanovu
e lassimi unni sugnu! Tuttu passa
e s’arridduci – vidi – com’a mia”.

– “Sugnu sulu, è Natali. Non ti spercia
di farimi na nticchia ‘i cumpagnia?”
La pusai supra o tavulu e sintii
ca mi calava u sonnu chianu chianu.

Ma cchi ti vidu? Stisa ‘n-terra c’era
na tuvagghia di linu granni granni,
puntiata di ciuri.
Sunavanu a distisa li campani
e me matri chiamava a vuci china:
“Viniti cà la tavula è cunzata:
tu puru, zingaredda addimannusa
ca proj ppi li strati
fiureddi di Santi;
tu puru, mircanteddu affamatizzu
ccu la facci spiruta nfumicata;
tu puru, furisteru vacabunnu,
ngriddutu di lu friddu nta na gnuni :
facemu tutti nsemi na famigghia!”

Lesti lesti currevanu
tutti li puvureddi di lu munnu,
s’assittavanu a tavula.
E supra la tuvagghia s’addumava
lu sbrinnuri di tanti stiddi russi
comu braci di focu.

Giuseppe Sciarrone
Messina

Annunci
%d blogger hanno fatto clic su Mi Piace per questo: