La stidda di Natali


Ricordu, quannu havìa cinc’annuzzi,
ca l’arma santa di la nanna mia
dicìa sempri ca li stiddi ‘ncelu
su angili di Cristu Ridinturi
Dda vicchiaredda, ccu prufunnu amuri,
parrava di ddu regnu senza fini
unni lu sdisanuri e la virgogna,
l’oddiu e la puvirtà ‘n-hannu spini.
Chiddu, dicìa-ricorditillu sempri
è un regnu ca mai s’ha conquistatu
facennu verra o ccu la priputenza,
ma ccu l’anima netta di piccatu!
E ‘njornu anticu si staccò ‘na stidda
spannennu nni ‘sta terra la so luci
di ridinzioni, paci e fratellanza…
Appoi, ppi genti storta, finiu ‘ncruci!
Ora ca sugnu granni, miu Signuri,
ascuta ‘sta prijera ca Ti rennu:
Stidda, arritorna ‘nta ‘sta terra ‘nfami
unni l’umanità niscìu di sennu.
L’omini janchi, nivuri e alivastri
Fa divintari tutti d’un coluri;
falli cchiu boni, pigghili ppi manu,
scancella la miseria e lu duluri!
E si ppi casu, ppi li vili giuda,
‘na nova cruci s’assignassi a Tia,
fa ca risplendi eterna la tò stidda
ppi comu m’insignò la nanna mia…

Riccardo Di Pasquale
Catania

Annunci
%d blogger hanno fatto clic su Mi Piace per questo: